पुणे, दि. १४ ऑगस्ट, २०२५: पुण्यातील चंदन नगर परिसरातून एक धक्कादायक घटना समोर आली आहे. किरकोळ वादामुळे एका तरुणाची निर्घृणपणे हत्या करण्यात आली आहे. ‘आय लव्ह यू’ म्हणण्यावरून झालेल्या वादामुळे ही घटना घडली असून, पोलिसांनी दोन आरोपींना अटक केली आहे.
नेमकं काय घडलं?
ही घटना १२ ऑगस्ट रोजी रात्री ८:३० च्या सुमारास घडली. मयत तरुणाचे नाव साईनाथ (वय ३५) असे आहे. साईनाथने आरोपी आदित्य वाल्हेकर यांच्या चुलत बहिणीला ‘आय लव्ह यू’ म्हटले होते. यावरून त्यांच्यात जोरदार वाद झाला. चंदन नगर पोलीस स्टेशनच्या वरिष्ठ पोलीस निरीक्षक सीमा ढेकणे यांनी दिलेल्या माहितीनुसार, ११ ऑगस्ट रोजी साईनाथने आदित्यच्या चुलत बहिणीचा विनयभंग केल्याचा आरोप आहे.
याच गोष्टीचा राग मनात धरून १२ ऑगस्ट रोजी आदित्य वाल्हेकर (वय २१) आणि त्याचा मित्र समर्थ उर्फ पप्पू शर्मा (वय २२) यांनी साईनाथला मारहाण केली. सुरुवातीला हाताने आणि लाथाबुक्क्यांनी मारहाण केल्यानंतर आदित्य घरी गेला आणि त्याने हॉकी स्टिक आणून साईनाथला पुन्हा मारहाण केली. मारहाणीत साईनाथ गंभीर जखमी झाला.
पोलीस कारवाई
या घटनेनंतर बेशुद्ध अवस्थेत सापडलेल्या साईनाथला ससून रुग्णालयात दाखल करण्यात आले, पण उपचारादरम्यान त्याला मृत घोषित करण्यात आले. शवविच्छेदन अहवालात गंभीर मारहाणीमुळे त्याचा मृत्यू झाल्याचे समोर आले आहे.
पोलिसांनी तात्काळ कारवाई करत आदित्य वाल्हेकर आणि समर्थ शर्मा या दोन्ही आरोपींना अटक केली आहे. याप्रकरणी खुनाचा गुन्हा दाखल करण्यात आला असून, पुढील तपास सुरू आहे. साईनाथ हा एकटाच राहत होता आणि त्याचे जवळचे कोणीही नातेवाईक नसल्याचे पोलिसांनी सांगितले आहे.
Instagram :
https://www.instagram.com/policernews
X Account :
Read Also
पुणे मेट्रो वेळ सुधारणा: सकाळी-संध्याकाळी दर ६ मिनिटांनी
