पुणे: सरत्या वर्षाला निरोप देऊन नवीन वर्ष २०२६ चे स्वागत करण्यासाठी पुणेकर सज्ज झाले आहेत. थर्टी फर्स्टच्या रात्री पुणे शहरातील मध्यवर्ती भाग, विशेषतः कॅम्प परिसरातील महात्मा गांधी रस्ता (MG Road), डेक्कनचा फर्ग्युसन रस्ता (FC Road) आणि जंगली महाराज रस्ता (JM Road) येथे होणारी प्रचंड गर्दी लक्षात घेता पुणे शहर वाहतूक पोलिसांनी विशेष नियमावली जाहीर केली आहे. सुरक्षिततेच्या दृष्टीने आणि वाहतूक कोंडी टाळण्यासाठी अनेक रस्ते ‘नो व्हेईकल झोन’ म्हणून घोषित करण्यात आले आहेत.
कॅम्प परिसरातील एम.जी. रोडवर दरवर्षीप्रमाणे यंदाही मोठी गर्दी होण्याची शक्यता आहे. त्यामुळे पोलीस उपायुक्त हिंमत जाधव यांनी दिलेल्या माहितीनुसार, एम.जी. रोडवरील १५ ऑगस्ट चौक ते अरोरा टॉवर या दरम्यान सर्व प्रकारच्या वाहनांना बंदी घालण्यात आली आहे. हा रस्ता केवळ पादचाऱ्यांसाठी खुला असेल.
- पर्यायी मार्ग: वाय जंक्शनकडून एम.जी. रोडकडे जाणारी वाहने १५ ऑगस्ट चौकात थांबवून ती कुरेशी मशीद आणि सुजाता मस्तानी चौकामार्गे वळवण्यात आली आहेत.
- इस्कॉन मंदिर परिसर: इस्कॉन मंदिर चौकाकडून डॉ. बाबासाहेब आंबेडकर पुतळा आणि अरोरा टॉवरकडे जाणारी वाहतूक पूर्णपणे बंद राहील. ही वाहतूक एसबीआय हाऊस चौक आणि तीन तोफा चौकामार्गे लष्कर पोलीस ठाण्याकडे वळवण्यात येईल.
तरुणाईचे आकर्षण असलेल्या डेक्कन जिमखाना परिसरातही कडक निर्बंध लादण्यात आले आहेत. गुड लक हॉटेल चौक ते फर्ग्युसन कॉलेजच्या मुख्य प्रवेशद्वारापर्यंतचा रस्ता ‘नो व्हेईकल झोन’ करण्यात आला आहे.
- जंगली महाराज रस्ता: जे.एम. रोडवरून येणारी वाहने झाशीची राणी लक्ष्मीबाई चौकातून गरजेनुसार वळवण्यात येतील.
- पर्यायी मार्ग: कोथरूड आणि कर्वे रस्त्याकडून येणारी वाहने खंडोजी बाबा चौकातून लॉ कॉलेज रोड किंवा प्रभात रोडमार्गे वळवली जातील.
केवळ वाहतूक बदलच नाही, तर ‘ड्रंक अँड ड्राईव्ह’ रोखण्यासाठी आरटीओ (RTO) आणि पुणे पोलिसांनी मोठी मोहीम हाती घेतली आहे. पुणे आरटीओने सहा भरारी पथके तैनात केली असून शहर आणि हायवेवरील महत्त्वाच्या चौकात ‘ब्रेथ ॲनालायझर’द्वारे तपासणी केली जाईल. मद्यप्राशन करून गाडी चालवणाऱ्यांचे चालक परवाने (License) जागेवरच निलंबित करण्याचे आदेश देण्यात आले आहेत.
३१ डिसेंबरच्या पहाटेपासून ते १ जानेवारीच्या मध्यरात्रीपर्यंत शहरातील महत्त्वाच्या प्रवेशद्वारांवरून अवजड वाहनांना बंदी घालण्यात आली आहे. यामध्ये प्रामुख्याने खालील ठिकाणांचा समावेश आहे: १. हॅरिस ब्रिज (खडकी) २. नवले पूल (वारजे) ३. कात्रज चौक ४. थेऊर फाटा (लोणी काळभोर) ५. मांतवाडी फाटा (फुरसुंगी)
पुणे पोलिसांनी नागरिकांना विनंती केली आहे की, ३१ डिसेंबरच्या सेलिब्रेशनसाठी घराबाहेर पडताना सार्वजनिक वाहतुकीचा (PMPML किंवा मेट्रो) जास्तीत जास्त वापर करावा. खाजगी वाहने आणल्यास पार्किंगच्या समस्यांना सामोरे जावे लागू शकते. तसेच, आपत्कालीन सेवा जसे की रुग्णवाहिका आणि अग्निशमन दलाच्या गाड्यांसाठी रस्ता मोकळा ठेवण्याचे आवाहनही करण्यात आले आहे.
पुणे शहरातील या वाहतूक बदलांमुळे नागरिकांनी सहकार्य करावे, जेणेकरून नवीन वर्षाचे स्वागत कोणत्याही अनुचित घटनेशिवाय पार पडेल.
Follow Us On
Read Also
