नवीन वर्षाचे स्वागत जगभरात उत्साहात होत असताना स्वित्झर्लंडमधून एक अत्यंत धक्कादायक आणि हृदयद्रावक बातमी समोर आली आहे. स्वित्झर्लंडमधील प्रसिद्ध स्की रिसॉर्ट असलेल्या ‘क्रॅन्स-माँटाना’ (Crans-Montana) येथील एका बारमध्ये नवीन वर्षाच्या जल्लोषात भीषण स्फोट झाला. या स्फोटानंतर लागलेल्या आगीत किमान ४० लोकांचा होरपळून मृत्यू झाला असून, १०० हून अधिक लोक जखमी झाल्याची भीती व्यक्त करण्यात येत आहे.
मिळालेल्या माहितीनुसार, ही घटना गुरुवारी (१ जानेवारी २०२६) पहाटे १:३० च्या सुमारास घडली. स्विस आल्प्समधील ‘ले कॉन्स्टेलेशन’ (Le Constellation) या लोकप्रिय बारमध्ये नवीन वर्षाचे सेलिब्रेशन सुरू होते. यावेळी बारमध्ये १०० पेक्षा जास्त पर्यटक आणि स्थानिक नागरिक उपस्थित होते. गाणी आणि संगीताच्या तालावर सर्वजण थिरकत असताना अचानक एका भीषण स्फोटाने संपूर्ण इमारत हादरली. स्फोट इतका जबरदस्त होता की क्षणात संपूर्ण बारला भीषण आगीने वेढले.
स्थानिक पोलीस प्रवक्ते गॅटन लॅथियन यांनी दिलेल्या माहितीनुसार, “आम्ही अनेक जखमी आणि मृतांना पाहिले आहे. स्फोटाचे कारण अद्याप स्पष्ट झालेले नाही, मात्र मृतांची संख्या ४० च्या वर असू शकते.” स्विस वृत्तवाहिनी ‘ब्लिक’ (Blick) ने दिलेल्या वृत्तानुसार, रुग्णालयांमध्ये भाजलेल्या रुग्णांची मोठी गर्दी झाली असून अनेक जण गंभीर अवस्थेत आहेत. मृतांमध्ये अनेक विदेशी पर्यटकांचाही समावेश असल्याची शक्यता आहे.
घटनेची माहिती मिळताच स्थानिक पोलीस, अग्निशमन दलाच्या गाड्या आणि हेलिकॉप्टर घटनास्थळी दाखल झाले. परिसरात ‘नो-फ्लाय झोन’ घोषित करण्यात आला असून संपूर्ण परिसर सील करण्यात आला आहे. जखमींना तातडीने जवळच्या रुग्णालयात दाखल करण्यात आले आहे. स्विस एअर रेस्क्यू सर्व्हिसच्या डॉक्टरांनी सांगितले की, आगीची तीव्रता जास्त असल्याने जखमींना वाचवण्याचे मोठे आव्हान प्रशासनासमोर आहे.
प्राथमिक तपासात असे समोर आले आहे की, बारमध्ये सुरू असलेल्या मैफिलीदरम्यान शोभेच्या दारूकामाचा (Pyrotechnics) वापर करण्यात आला होता. या फटाक्यांमुळेच स्फोट होऊन आग लागली असावी, असा अंदाज वर्तवण्यात येत आहे. मात्र, पोलिसांनी अद्याप याला अधिकृत दुजोरा दिलेला नाही. ही घटना दहशतवादी हल्ला नसल्याचे पोलिसांनी प्राथमिक तपासात स्पष्ट केले आहे.
बाधित कुटुंबांच्या मदतीसाठी प्रशासनाने तातडीने हेल्पलाइन क्रमांक (+41 84 811 21 17) जारी केला आहे. तसेच पीडितांच्या नातेवाईकांसाठी एक विशेष रिसेप्शन सेंटरही उभारण्यात आले आहे.
क्रॅन्स-माँटाना हे स्वित्झर्लंडमधील अत्यंत आलिशान आणि प्रसिद्ध पर्यटन स्थळ मानले जाते. या ठिकाणी दरवर्षी हजारो आंतरराष्ट्रीय पर्यटक नवीन वर्षाच्या स्वागतासाठी येतात. या भीषण दुर्घटनेमुळे संपूर्ण स्वित्झर्लंडमध्ये शोककळा पसरली असून नवीन वर्षाच्या सेलिब्रेशनवर विरजण पडले आहे.
Follow Us On
Read Also
