शहरातील आकाशवाणी परिसरातील फ्रीडम टॉवर्समध्ये असलेल्या ‘ट्रेझ द फॅशन वर्ल्ड’ या कपड्यांच्या दुकानात सवलतीच्या दरात कपडे खरेदी करण्यासाठी महिलांची तुफान गर्दी झाली होती. या गर्दीत गुदमरल्यामुळे तीन महिला बेशुद्ध पडल्याची धक्कादायक घटना घडली आहे. याप्रकरणी पोलिसांनी गांभीर्याने दखल घेत दुकान मालकांविरुद्ध निष्काळजीपणाचा गुन्हा दाखल केला आहे.
मिळालेल्या माहितीनुसार, ‘ट्रेझ द फॅशन वर्ल्ड’ या दुकानाचा रविवारी शुभारंभ होता. या निमित्ताने दुकान मालकांनी सोशल मीडियाच्या माध्यमातून, विशेषतः इन्स्टाग्राम रील्सद्वारे कपड्यांवर भरघोस सवलत जाहीर केली होती. अतिशय स्वस्त दरात कपडे मिळणार असल्याने रविवारी सकाळी १० वाजेपासूनच दुकानासमोर महिलांची मोठी गर्दी जमू लागली. हळूहळू या गर्दीचे रूपांतर तुफान जनसमुदायात झाले.
दुकान मालकांनी विक्री वाढवण्यासाठी मोठी जाहिरात केली खरी, मात्र त्या प्रमाणात सुरक्षिततेचे कोणतेही नियोजन केले नव्हते. दुकानात जाण्यासाठी केवळ एकच अरुंद शटर (प्रवेशद्वार) होते. एकाच वेळी शेकडो महिलांनी दुकानात शिरण्याचा प्रयत्न केल्यामुळे तिथे चेंगराचेंगरीची परिस्थिती निर्माण झाली. दुकानात वेंटिलेशनची सोय नसल्याने आणि कडक उन्हामुळे महिलांना श्वास घेण्यास त्रास होऊ लागला.
या गर्दीच्या दबावामुळे तीन महिलांना चक्कर आली आणि त्या जागीच बेशुद्ध पडल्या. यामुळे परिसरात एकच खळबळ माजली. तिथे उपस्थित असलेल्या इतर नागरिकांनी तातडीने पोलिसांना पाचारण केले आणि बेशुद्ध महिलांना उपचारासाठी रुग्णालयात दाखल करण्यात आले.
जवाहरनगर पोलीस स्टेशनचे वरिष्ठ पोलीस निरीक्षक सचिन कुंभार आणि त्यांच्या पथकाने घटनास्थळी धाव घेत गर्दीवर नियंत्रण मिळवले. पोलिसांनी दिलेल्या माहितीनुसार, दुकान मालक कृष्ण रघुनाथ देशमुख (वय ३०) आणि संजय लालवाणी यांच्या विरोधात गुन्हा दाखल करण्यात आला आहे.
मालकांनी एवढ्या मोठ्या प्रमाणात गर्दी होईल याचा अंदाज असूनही सुरक्षेचे कोणतेही उपाय केले नव्हते. तिथे पिण्याचे पाणी, रुग्णवाहिका, अग्निशमन यंत्रणा किंवा आपत्कालीन बाहेर पडण्याचे द्वार (Emergency Exit) उपलब्ध नव्हते. तसेच सध्या शहरात आचारसंहिता लागू असताना आणि जमावबंदीचे आदेश असताना अशा प्रकारची मोठी गर्दी जमवणे हा नियमांचा भंग असल्याचे पोलिसांनी सांगितले.
पोलिसांनी सांगितले की, केवळ नफा कमवण्याच्या उद्देशाने अशा प्रकारच्या ऑफर्स दिल्या जातात, परंतु ग्राहकांच्या सुरक्षिततेकडे पूर्णपणे दुर्लक्ष केले जाते. अरुंद जागेत शेकडो लोकांना बोलावणे हे मानवी जीविताशी खेळण्यासारखे आहे. या घटनेनंतर पोलिसांनी दुकानदारांना नोटीस बजावली असून पुढील तपास सुरू आहे.
सध्या सणासुदीचे आणि लग्नसराईचे दिवस असल्याने अनेक ठिकाणी अशा प्रकारच्या ‘धमाका ऑफर्स’ दिल्या जातात. मात्र, अशा ठिकाणी जाण्यापूर्वी नागरिकांनी स्वतःच्या सुरक्षिततेचा विचार करावा. ज्या ठिकाणी सुरक्षिततेची खातरजमा नाही किंवा जिथे अवाजवी गर्दी आहे, अशा ठिकाणी जाणे टाळावे, असे आवाहन पोलीस प्रशासनाकडून करण्यात आले आहे.
Follow Us On
Read Also
