अंबरनाथ: अंबरनाथच्या राजकारणात एक अत्यंत धक्कादायक आणि मोठा ट्विस्ट पाहायला मिळाला आहे. अंबरनाथ नगरपालिकेवर वर्चस्व राखणाऱ्या मुख्यमंत्री एकनाथ शिंदे यांच्या नेतृत्वाखालील शिवसेनेला (शिंदे गट) सत्तेपासून दूर ठेवण्यासाठी भाजपने थेट काँग्रेस आणि राष्ट्रवादी काँग्रेस (अजित पवार गट) यांच्याशी हातमिळवणी केली आहे. या तिन्ही पक्षांनी मिळून ‘अंबरनाथ विकास आघाडी’ स्थापन केली असून, या नवीन गटाची अधिकृत नोंदणी जिल्हाधिकाऱ्यांकडे करण्यात आली आहे.
अंबरनाथ नगरपालिकेच्या निवडणुकीत शिंदेसेना २७ नगरसेवकांसह सर्वात मोठा पक्ष ठरला होता. मात्र, भाजपने चतुराईने आपला नगराध्यक्ष निवडून आणला. आता पूर्ण सत्ता ताब्यात घेण्यासाठी भाजपने अनपेक्षित पाऊल उचलले आहे. ‘अंबरनाथ विकास आघाडी’मध्ये भाजपचे १४, काँग्रेसचे १२, राष्ट्रवादी (अजित पवार) चे ४ आणि एक अपक्ष अशा एकूण ३१ नगरसेवकांचा समावेश आहे. नगराध्यक्षांसह ही संख्या ३२ वर पोहोचते, ज्यामुळे शिंदे गट सत्तेबाहेर फेकला गेला आहे.
भाजपने या युतीचे समर्थन करताना अंबरनाथ शहराला ‘भ्रष्टाचारमुक्त’ आणि ‘भयमुक्त’ करण्याचा नारा दिला आहे. भाजपचे प्रदेश सचिव गुलाबराव करंजुले पाटील यांनी सांगितले की, शहराच्या विकासासाठी आणि पारदर्शक कारभारासाठी हा निर्णय घेण्यात आला आहे. स्थानिक पातळीवर शिंदेसेनेच्या काही पदाधिकाऱ्यांच्या कार्यपद्धतीला भाजपचा विरोध होता, त्यामुळेच नैसर्गिक युती बाजूला सारून भाजपने काँग्रेससोबत जाण्याचा निर्णय घेतला.
राज्यात महायुतीचे सरकार असताना स्थानिक पातळीवर भाजप आणि काँग्रेस एकत्र आल्याने राजकीय वर्तुळात चर्चांना उधाण आले आहे. शिंदेसेनेचे आमदार डॉ. बालाजी किणीकर यांनी यावर तीव्र प्रतिक्रिया दिली आहे. “भाजप आणि शिवसेना ही नैसर्गिक युती आहे, मात्र अंबरनाथमध्ये भाजपने काँग्रेससोबत केलेली युती ही ‘अभद्र युती’ आहे,” अशी टीका त्यांनी केली आहे.
या नवीन आघाडीमुळे अंबरनाथ नगरपालिकेतील समित्यांवरील निवडीत आता विकास आघाडीचे वर्चस्व राहणार आहे. तसेच स्वीकृत नगरसेवकांच्या संख्येतही या आघाडीचा फायदा होणार आहे. आगामी महापालिका निवडणुकीच्या पार्श्वभूमीवर शिंदे गटासाठी हा मोठा सेटबॅक मानला जात आहे. काँग्रेस आणि राष्ट्रवादीच्या स्थानिक नेत्यांनीही “द्वेषाचे राजकारण सोडून शहराच्या शाश्वत विकासासाठी आम्ही एकत्र आलो आहोत,” असे स्पष्ट केले आहे.
Follow Us On
Read Also
