बंगळुरूतील एअर फोर्स अधिकाऱ्यांवर हल्ला प्रकरणात नवा ट्विस्ट; दोन्ही बाजूंनी मारहाण, सीसीटीव्ही व्हिडिओ उघड.
बंगळुरूमध्ये एअर फोर्स अधिकाऱ्यांवर झालेल्या हल्ल्याच्या प्रकरणात नवा व्हिडिओ समोर; विंग कमांडर शिलादित्य बोस आणि आरोपी दोघांनीच एकमेकांवर हल्ला केल्याचे पोलिसांचे स्पष्टीकरण. सोशल मीडियावर चुकीचा अपप्रचार.
बंगळुरू | प्रतिनिधी
बंगळुरूमध्ये एअर फोर्स अधिकाऱ्यावर झालेल्या हल्ल्याच्या प्रकरणात आता नवे वळण आले आहे. विंग कमांडर शिलादित्य बोस आणि त्यांची पत्नी स्क्वॉड्रन लीडर मधुमिता बोस यांच्यावर झालेल्या हल्ल्याचा नवा व्हिडिओ समोर आला असून त्यात दोन्ही बाजूंनी मारहाण झाल्याचे स्पष्ट दिसत आहे.
विंग कमांडर बोस यांनी रक्तबंबाळ अवस्थेत एक व्हिडिओ पोस्ट केला होता, ज्यामध्ये त्यांच्या चेहऱ्यावर आणि गळ्यावर जखमा दिसत होत्या. त्यांनी सांगितले की, “बाईकस्वाराने गाडी अडवून कन्नडमध्ये शिवीगाळ केली आणि DRDO स्टिकर पाहून पत्नीला व मला मारहाण केली.”
या घटनेनंतर आरोपी विकस कुमार यानेही बोस यांच्याविरोधात पोलिसांत तक्रार दाखल केली आहे. पोलिसांनी तपासादरम्यान चार सीसीटीव्ही फुटेज मिळवले असून, त्यामध्ये दोन्ही बाजू एकमेकांवर हल्ला करताना दिसत आहेत.
डिप्टी कमिशनर ऑफ पोलिस (ईस्ट) देवराज डी यांनी सांगितले की, “हे प्रकरण एकतर्फी नसून ‘रोड रेज’चे आहे. सोशल मीडियावर ‘कन्नड विरुद्ध इतर’ असे चुकीचे रंग देण्याचा प्रयत्न झाला, परंतु असे काहीही नाही.”
बोस यांच्या पत्नीने पोलिसांत दिलेल्या तक्रारीनुसार, सकाळी लवकर ते DRDO कॉलनीतून एअरपोर्टकडे जात होते. एक बाईकस्वार चुकीच्या पद्धतीने वाहन चालवत होता, आणि त्यांनी पाहिले म्हणून संतप्त होऊन त्याने गाडी अडवली व शिवीगाळ केली.
आरोपीने गाडीवर दगड फेकण्याचा प्रयत्न केला, जो बोस यांच्या कपाळावर लागला. नंतर त्याने रस्त्यावर ओढत नेत मारहाण केली, असे मधुमिता बोस यांनी सांगितले.
पोलिसांनी सांगितले की, विंग कमांडर बोस जखमी अवस्थेत पोलीस ठाण्यात आले, पण उशीर होणार असल्यामुळे ते तक्रार नोंदवण्याआधी निघून गेले. त्यानंतर त्यांनी व्हिडिओ पोस्ट केला. त्यानंतर पोलिसांनी DRDO क्वार्टर्सशी संपर्क साधून त्यांच्या पत्नीची तक्रार घेतली आणि FIR दाखल केला.
हा व्हिडिओ सोशल मीडियावर वेगाने व्हायरल झाला असून अनेकांनी यामध्ये प्रादेशिक भावना चिथावणारे विधान केल्याचा आरोप केला. परंतु, पोलिसांनी स्पष्ट केलं आहे की ही घटना प्रादेशिक द्वेषाशी संबंधित नसून केवळ रोड रेजमुळे घडली आहे.
