नाशिक जिल्ह्यातील भगूर नगरपरिषदेच्या निवडणुकीत मोठा राजकीय उलटफेर झाला आहे. येथे गेल्या २७ वर्षांपासून शिवसेनेची सत्ता होती, पण यंदाच्या निवडणुकीत मतदारांनी शिवसेनेला मोठा धक्का देत अजित पवार गटाच्या राष्ट्रवादी काँग्रेसला विश्वास दाखवला आहे. भगूर नगरपरिषदेच्या अध्यक्षपदी राष्ट्रवादी काँग्रेसच्या प्रेरणा बलकवडे यांनी विजय मिळवला आहे, ज्यामुळे शिवसेनेच्या २७ वर्षांच्या सत्तेचा अंत झाला आहे.
भगूर हे स्वातंत्र्यवीर सावरकर यांचे गाव म्हणून प्रसिद्ध आहे. येथे गेल्या काही दशकांपासून करंजकर आणि बलकवडे या दोन राजकीय कुटुंबांमध्ये परंपरागत लढाई चालत आली आहे. गेली २७ वर्षे या गावात विजय करंजकर आणि शिवसेनेची सत्ता होती. मात्र, लोकसभा निवडणुकीत तिकीट नाकारल्यानंतर करंजकर उद्धव ठाकरेंच्या शिवसेनेतून शिवसेना शिंदे गटात गेले. त्याच वेळी, राष्ट्रवादी काँग्रेस दोन गटांमध्ये विभागली गेली आणि प्रेरणा बलकवडे अजित पवार गटात गेल्या. देवळाली मतदारसंघ राखीव असल्याने प्रेरणा बलकवडे यांना आमदारकी लढता आली नाही, त्यामुळे त्यांनी भगूर नगरपरिषदेची निवडणूक प्रतिष्ठेची केली.
या निवडणुकीत प्रेरणा बलकवडे यांना ५ हजार ४०७ मते मिळाली, तर शिवसेना (शिंदे गट) च्या अनिता करंजकर यांना ३ हजार ४९४ मते मिळाली. मतमोजणीला सुरुवात होताच अजित पवार गटाच्या राष्ट्रवादी काँग्रेसने आघाडी घेतली आणि पहिल्या काही फेऱ्यांमध्येच विजय निश्चित केला. प्रेरणा बलकवडे यांना भाजपचा पाठिंबा होता आणि त्यांच्या विजयामुळे भगूरमध्ये सत्ताबदल झाला आहे.
या निवडणुकीत भगूर नगरपरिषदेच्या १७ जागांपैकी अजित पवार गटाच्या राष्ट्रवादी आणि भाजप युतीला १० जागा मिळाल्या, तर शिवसेना (शिंदे गट) ला ७ जागा मिळाल्या. या निकालामुळे भगूरच्या राजकारणात मोठा बदल झाला आहे. राष्ट्रवादी काँग्रेसच्या आमदार सरोज अहिरे यांनी या विजयाचे स्वागत करत ३० वर्षांचा राजकीय वनवास संपल्याचे सांगितले. भगूर नगरपरिषदेत अजित पवार गटाचा हा विजय राज्याच्या राजकारणात चर्चेचा विषय ठरला आहे.
Follow Us On
Read Also
