नवी दिल्ली/नोएडा: नवीन वर्षाच्या पूर्वसंध्येला (New Year’s Eve) देशभरातील डिलिव्हरी कामगारांनी पुकारलेल्या संपाला आता हिंसक वळण लागल्याचे चित्र दिसत आहे. ३१ डिसेंबर रोजी स्विगी, झोमॅटो आणि ब्लिंकिट (Blinkit) च्या कामगारांनी विविध मागण्यांसाठी संप पुकारला असतानाच, एका डिलिव्हरी बॉयला काही तरुणांनी बेदम मारहाण केल्याचा धक्कादायक व्हिडिओ समोर आला आहे. संपात सहभागी न होता डिलिव्हरी सुरू ठेवल्याच्या रागातून ही मारहाण झाल्याचा प्राथमिक संशय व्यक्त केला जात आहे.
सोशल मीडियावर व्हायरल होत असलेल्या व्हिडिओमध्ये दिसते की, ब्लिंकिटचा टी-शर्ट घातलेला एक तरुण आपली दुचाकी घेऊन जात असताना त्याला काही जणांनी रस्त्यात अडवले. या तरुणाने संपाच्या आवाहनाकडे दुर्लक्ष करून ग्राहकांना ऑर्डर पोहोचवण्याचे काम सुरू ठेवले होते. यामुळे चिडलेल्या काही आंदोलकांनी त्याला घेराव घातला आणि त्याच्यावर लाथाबुक्क्यांनी हल्ला केला.
हा तरुण मदतीसाठी आरडाओरडा करत असतानाही त्याला वाचवण्यासाठी कोणी पुढे आले नाही. या मारहाणीत त्याच्या दुचाकीचेही नुकसान झाले आहे. ही घटना नेमकी कोणत्या शहरातील आहे, याबाबत अधिकृत दुजोरा मिळाला नसला तरी, हा व्हिडिओ दिल्ली-एनसीआर (नोएडा) परिसरातील असल्याचे बोलले जात आहे.
३१ डिसेंबरच्या रात्री जेव्हा जेवण आणि किराणा मालाच्या ऑनलाईन ऑर्डरचे प्रमाण प्रचंड असते, तेव्हाच कामगारांनी कामावर बहिष्कार टाकला आहे. पे-आउटमध्ये वाढ, अपघाती विमा आणि कामाच्या ठिकाणी सुरक्षा या मागण्यांसाठी १.५ लाखांहून अधिक कामगार संपावर आहेत. या संपाचा मोठा फटका डिलिव्हरी सेवांना बसला असून अनेक भागांत सेवा पूर्णपणे ठप्प आहे.
डिलिव्हरी बॉयला झालेल्या मारहाणीचा व्हिडिओ व्हायरल झाल्यानंतर नेटिझन्सनी संताप व्यक्त केला आहे. “आपल्या हक्कासाठी लढा देणे योग्य आहे, पण स्वतःच्याच सहकाऱ्यावर हात उचलणे अत्यंत चुकीचे आहे,” अशा प्रतिक्रिया सोशल मीडियावर उमटत आहेत. अनेक युजर्सनी संबंधित कंपन्या आणि पोलिसांना टॅग करून या हिंसाचारावर कडक कारवाई करण्याची मागणी केली आहे.
ब्लिंकिट आणि झोमॅटो प्रशासनाने या घटनेची गंभीर दखल घेतली असून, आपल्या ‘डिलिव्हरी पार्टनर्स’च्या सुरक्षिततेसाठी आवश्यक ती पावले उचलली जात असल्याचे सांगितले आहे. तसेच, ज्यांनी हिंसाचार केला आहे, त्यांच्यावर कायदेशीर कारवाई करण्यासाठी पोलिसांशी समन्वय साधला जात आहे. अनेक शहरांत पोलिसांनी संपाच्या पार्श्वभूमीवर डिलिव्हरी बॉईजवर हल्ले होऊ नयेत म्हणून महत्त्वाच्या चौकांत गस्त वाढवली आहे.
३१ डिसेंबरच्या पार्टीसाठी किराणा माल किंवा तयार जेवण मागवणाऱ्या ग्राहकांना ‘सर्व्हिस अनअव्हेलेबल’ किंवा ‘डिलिव्हरी डिले’ (उशीर) सारख्या समस्यांना सामोरे जावे लागत आहे. अशातच हिंसाचाराच्या घटनांमुळे उरले-सुरले डिलिव्हरी कामगारही भीतीपोटी घराबाहेर पडण्यास तयार नाहीत.
Follow Us On
Read Also
