बारामती: राज्याच्या राजकारणात आणि समाजकारणात ‘बारामती मॉडेल’ नेहमीच चर्चेचा विषय राहिले आहे. मात्र, आज बारामतीने केवळ तंत्रज्ञानाच्या क्षेत्रातील प्रगतीच पाहिली नाही, तर दोन दिग्गजांमधील गुरु-शिष्यासारखे नातेही अनुभवले. बारामतीत देशातील पहिल्या अत्याधुनिक ‘आर्टिफिशियल इंटेलिजन्स’ (AI) महाविद्यालयाच्या उद्घाटनासाठी आलेले उद्योगपती गौतम अदानी यांनी चक्क ज्येष्ठ नेते शरद पवार यांना आपले ‘मार्गदर्शक’ (Mentor) असल्याचे जाहीर केले. यावेळी त्यांनी पवारांच्या कृषी, ग्रामीण विकास आणि राष्ट्रीय हिताच्या धोरणांचे तोंडभरून कौतुक केले.
एआय महाविद्यालयाचे ऐतिहासिक उद्घाटन
विद्या प्रतिष्ठानच्या माध्यमातून बारामतीत माहिती तंत्रज्ञानाच्या पुढच्या टप्प्यातील ‘एआय’ महाविद्यालयाची उभारणी करण्यात आली आहे. या महाविद्यालयाचे उद्घाटन गौतम अदानी यांच्या हस्ते पार पडले. याप्रसंगी शरद पवार, उपमुख्यमंत्री अजित पवार, खासदार सुप्रिया सुळे, खासदार सुनेत्रा पवार, आमदार रोहित पवार आणि पवार कुटुंबातील इतर सदस्य उपस्थित होते. राजकारणातील गटतटाच्या पलीकडे जाऊन एका शैक्षणिक आणि विकासकामासाठी संपूर्ण पवार कुटुंब एकाच मंचावर आल्याचे चित्र यावेळी पाहायला मिळाले.
आपल्या भाषणादरम्यान गौतम अदानी यांनी शरद पवार यांच्याबद्दल अत्यंत आदरयुक्त भावना व्यक्त केल्या. अदानी म्हणाले, “परिवर्तनाचे प्रतीक म्हणून आज जगाचे लक्ष बारामतीकडे आहे. एका नेतृत्वाच्या दूरदृष्टीमुळे एखादा भाग कसा प्रगत होऊ शकतो, याचे उत्तम उदाहरण म्हणजे बारामती आणि शरद पवार साहेब आहेत. शरद पवार साहेब हे माझ्यासाठी केवळ एक ज्येष्ठ नेते नाहीत, तर ते माझे मार्गदर्शक आणि आदर्श आहेत. त्यांना सर्वच क्षेत्रातील सखोल माहिती आहे, जी थक्क करणारी आहे.”
अदानी पुढे म्हणाले की, “शरद पवार यांनी देशाचे कृषिमंत्री असताना राबवलेली धोरणे, अन्नसुरक्षा कायदा आणि सहकारी संस्थांचे जाळे यांमुळे ग्रामीण भारताचे चित्र बदलले आहे. मुख्यमंत्री असताना त्यांनी महाराष्ट्रात राबवलेली विकासाची धोरणे आजही मार्गदर्शक ठरतात. राष्ट्रीय हिताचा विचार करून धोरणे राबविणारा असा नेता आजच्या काळात क्वचितच पाहायला मिळतो.”
पवार कुटुंबातील ‘मनमोकळा संवाद’
कार्यक्रमात केवळ औपचारिक भाषणेच झाली नाहीत, तर पवार कुटुंबातील जिव्हाळ्याच्या संबंधांचेही दर्शन घडले. उपमुख्यमंत्री अजित पवार यांनी आपल्या भाषणात मिश्किल टिप्पणी करत बारामतीकरांना हसवून सोडले. त्यांनी भाषणाची सुरुवात करताना सुप्रिया सुळे, सुनेत्रा पवार आणि रोहित पवार यांचा उल्लेख ज्या खास शैलीत केला, त्यामुळे सभागृहात हास्याचे कारंजे उडाले. राजकीय मैदानात एकमेकांवर टीका करणारे नेते कौटुंबिक आणि सामाजिक मंचावर किती खेळीमेळीने वागतात, हे या कार्यक्रमातून दिसून आले.
अदानींनी उलगडला बारामतीचा विकास प्रवास
गौतम अदानी यांनी आपल्या भाषणात बारामतीच्या प्रगतीचा गौरव केला. “शून्यातून विश्व कसे निर्माण करावे, हे बारामतीकडे पाहून शिकता येते. येथे केवळ इमारती उभ्या राहिल्या नाहीत, तर संस्कार आणि तंत्रज्ञानाची सांगड घातली गेली आहे. या एआय महाविद्यालयामुळे येणाऱ्या काळात बारामतीतून जागतिक दर्जाचे तंत्रज्ञ घडतील,” असा विश्वास त्यांनी व्यक्त केला.
पवार कुटुंबानेही यावेळी अदानींच्या संघर्षाचे कौतुक केले. सुप्रिया सुळे यांनी अदानींसोबतच्या ३० वर्षांच्या कौटुंबिक संबंधांना उजाळा दिला, तर अजित पवार यांनी अदानी समूहाच्या रोजगारातील आणि सौर ऊर्जेतील योगदानाची आकडेवारी मांडली.
भविष्यातील भारताचा वेध
या कार्यक्रमाच्या निमित्ताने ‘उद्याचा भारत’ कसा असेल, याचा विचार मंचावर मांडण्यात आला. कृत्रिम बुद्धिमत्ता (AI) हे भविष्यातील सर्वात मोठे शस्त्र आहे आणि त्याची मुहूर्तमेढ बारामतीसारख्या ग्रामीण भागात होणे, ही देशासाठी मोठी उपलब्धी मानली जात आहे. शरद पवार यांनीही आपल्या भाषणात अदानींना आमंत्रित करण्यामागचा हेतू स्पष्ट करताना सांगितले की, तरुणांना उद्योजकतेची आणि संघर्षाची प्रेरणा मिळावी, हाच आमचा उद्देश होता.
राजकीय वर्तुळात या भेटीचे अनेक अर्थ काढले जात असले, तरी हा सोहळा विकासाची नवी दिशा देणारा ठरला, यात शंका नाही.
Follow Us On
Read Alsoमहाराष्ट्र
